Leterature furlane

Ancje se lis primis formis poetichis a son stadis datadis al XIV secul (poesiis anonimis come Piruç myò doç inculurît e Soneto furlan, che vegnin di Cividât e a son dongje ai argoments e a lis ideis dal Dolce Stil Novo), la nassude di une vere leterature furlane si pues viodi dome tal XIX secul, cuant che il Friûl, daspò dal congrès di Viene, al passà par intîr sot dal control dal Imperi Asburgjic. Lis causis di cheste floridure cussì ritardade a son diviersis: pe prime robe, la lenghe de culture e de aministrazion no fo mai il furlan, ma prime il latin e parzialmentri il todesc tal Patriarcjât di Acuilee, dopo il talian messedât cul venit sot dal domini de Serenissime; cun di plui, in Friûl no si formà mai une borghesie, che i plasès la leterature e metès bêçs pal so disvilup, che varès judât ancje chel de lenghe. Tal XVI secul, par esempli, a forin dome pocjis oparis par furlan, pi che altri ispiradis ai lavôrs di Francesco Petrarca; di chescj periodi, a son di ricuardâ Nicolò Morlupin di Vençon (1528-1570) e Girolamo Biancone di Tumieç. Si scugne ancje visâsi che fintremai il Votcent a no forin lavôrs par furlan stampâts, par cui la circolazion e jere limitade a une piçule clape di nobii.